Kritischer Zeitungskommentar up Platt

Johann Saathoff nimmp dei AFD den Wind ut dei Sägels

 

von Hubert Hesselfeld aus Lohne

 

Nu wät`t wi dat aal: Angela Merkel is werrer wählt worn. Un wi häbbt nu in Dütschland eine neie Regierung, sogor ein`n Minister för Heimat. Hei kummp ut Bayern, aower dat schall us ja woll nich tau daone störn.

Dor staunden dei Lüe in usen dütschen Bundestag. Un dat in eine Sitzung vör dei Waohl von Angela. Dei AFD har einen Andrag stellt. Dei dütsche Spraoke wör doch so wichtig. Dat möss doch uck in us Grundgesetz fastesett`t wern, datt aal Lüe uck richtig Dütsch schnacken schullen. Dütsch schull Landesspraoke wern.

Dei ännern Parteien harn woll eine ännere Meenung. Un dei junge Johann Saathoff ut Emden, dei vonne SPD in Berlin sitt, begeisterde dei Lüe von dat Rädnerpult ut. Hei  stellde in sien ostfriesischet Platt faste:

Dütschland wedd nich armer dör ännere Spraoken. Dütschland wedd rieker. Kien Mensch bruukt Angst häbben vör dei Spraoke von Menschken ut  ännere Länder. Nä, dat giff masse Vördeile. Un wecker dor Angst häff, dei igelt sick in. Spraoke is Kultur, nich bloß dei hochdütsche.

Tüschkendor schnackde Saathoff uck manges Hochdütsch. Aal dei Fraulüe un Kerls in dat Hooge Huus in Berlin käönt ja nich mit use schöne Spraoke ümgaohn.

Nu häbbt ja vör Johren uck in use Gägend masse Lüe dacht, wenn sei mit dei Kinner Plattdütsch schnacken dön, harn si dat in`n Läben manges schwor. Vandaoge weit man, datt Kinner kläuker werd, wenn sei mehrspraokig upwasst.

Wi dräöwt  Johann Saathoff tau siene Räde von Harten gralleiern. Hei häff us ut dei Seele spraoken.

Un för aal dei Läsers von use Heimatspraoke, dei dat immer noch nich wät`t : Plattdütsch is kien Dialekt, dat is eine eigene Spraoke.

Wenn ick nu in Berlin wat tau säggen har, dann wüdd ick Johann Saathoff tau`n Staotssekretär för dat Plattdütsche vörschlaogen. Hei kennt sick in dei Saoke un Spraoke ut un kann uck noch gaut schnacken. Vellicht fallt den neien Heimatminister ut Bayern dor noch wat tau in.

 

„Dütschland wedd dör ännere Spraoken rieker.“

 

 

Wortverklorn: Sägel – Segel; tau daone – zu sehr; rieker – reicher;  taurechte – zurecht; dräöwt – dürfen; gralleiern – gratulieren.